الثلاثاء، 29 أبريل، 2008

حلم.. بيتحقق ..

عايزاك تزرع لي
جنب بيتنا
اللي ف خيالي
شجرة توت كبيرة
خضرة ..
وطارحة
طول السنة ..
فروعها مايلة حبتين
لاجل تضلل على البيت..
ورقها الاخضر
يرقص ويغني
مع النسيم..
وتوتها قريب
لايدين ولادنا الصغيرين..
*
وما تنساش
تعمل مرجيحة
بين النخلتين..
ايوة نخلتين
على بعض
مايلين..
زي ما يكونوا اتنين
في حالة وجد..
ويحلم الولدين
وهما بيتمرجحوا
امتى يكبروا
علشان يطلعوا
ويسمعوا بيقولوا ايه..
*
أما بيتنا اللي ف خيالي
عايزاه من الطين
بسقف عالي
شايلاه عروق خشب
معشش فيهم
عصفورين..
زقزقتهم تصحينا
نغسل وشنا
بلون الشروق..
ولون الحيطان
سماوي
معلهمش لوح
الا شخبطة
ايدين
ولادنا الصغيرين..
*
ويكون البيت
على شط صغير
طرح بحر
للنيل..
*
وجنب البيت
والتوتة والنخلتين
ما تنساش
تزرع شجر
فل وياسمين
اعمل منهم عقود
الفها حولين
ايدين ولادنا
الصغيرين
*
أما عن المزيكا
فلو سمحت
مفيش ف البيت
غير زقزقة العصفورين
ورقص ورق التوت
مع النسيم
وضحكة ولادنا
الفرحانين..
25.04.2008

هناك 15 تعليقًا:

محمد صبحى يقول...

ياسيدى ع الجمال والروقان

شكلك حنيّتى لأيام الريف

على كده أعتبر نفسى مدّلع
لإنى عايش ف الريف

Ema يقول...

حلمك ده أنا كمان بحلم بيه بس مش عارفه إمتى هحققه,ربا يدينا طولة العمر ,بس أسلوبك رشق وجميل.

احمد ابوالعلا يقول...

القصيدة بها قدرة عالية على التصوير وكأنها لوحة تشكيلية جميلة ومرهفة ارجو ان تستمرى فى الكتابة لأن كتابتك يميزها الاحساس الصادق والعفوية ...تحياتى

واحد من البلد دى يقول...

حرام عليكى
ده على بال ما يزرع كل ده يكون حيله اتهد..هههههههههههه
بجد تسلم إيدك ..خيال حضرتك فعلا خصب جدا..
أسلوبك جميل جدا
تحياتى ليكى

Zianour يقول...

شكر لكم يا جماعة ردودكم تدفعني دفعاً لهوايتي القديمة!!
محمد : في سنك كنت مشدودة بقوة سحرية الى المدينة اللي هي النداهة والمدينة يعني القاهرة التي تتحدى قوتنا وتعيش على شبابنا بس ف سني-!- رجعت للريف من 4 سنوات ولا تتخيل حجم الثراء والسكينة لا اعتقد انك ستكتشف ذلك الان!!
ايما : يا رب يحقق لك حلمك وتحقيقه سهل على فكرة(: طرح البحر (يعني شط النيل اللي لسه بكر ويزرعه الفلاحون ده بوضع اليد وتدفعي خلو لاي فلاح وينتقل لاسمك تدفعي مصاريف سنوية للحكومة بس مش بيبقى ملك تزرعيه زي ما انت عاوزة، ورد توت تين ملوخية بلا اي اسمدة والنتيجة مذهلة!!!)

استاذ احمد : شكرا على الاطراء يا فندم وساستمر لانه لا مفر!!

واحد من البلد : لا والله رفيق الدرب لا يدخر وسعا للعطاء وهو يحب العمل ف الطبيعة -اصل الخزنة في المكاتب دي قاتلة - الطبيعة تشحذ الحواس التي يقتلها الروتين..

محمد صبحى يقول...

Zianour

لا والله أنا مكتشف ده من دلوقتى
بس برضه لكل مميزاته

تحياتى ليكى

monaliza يقول...

ربنا يحقق لك كل احلامك
=================================
هااااااااام

ساهم بتوقيعك في مطالبة الحكومة الهولندية بسن قوانين من شأنها حماية المسلمين من العبث بمقدساتهم الدينية خاصة ومن التجديف على الأديان عامة على الرابط التالي

http://kawlansadida.blogspot.com/2008/04/blog-post_21.html و

جزاكم الله عن إسلامكم خيراً"

ياأبت...إني رأيت يقول...

شكرا لك
لمجهودك لأنك أدخلتي علي قلبي النشوة ,حينما قرأت هذه الأبيات , عجبني جدا هذا المقطع.


أما بيتنا اللي ف خيالي
عايزاه من الطين
بسقف عالي
شايلاه عروق خشب
معشش فيهم
عصفورين..
زقزقتهم تصحينا
نغسل وشنا
بلون الشروق..
ولون الحيطان
سماوي
معلهمش لوح
الا شخبطة
ايدين
ولادنا الصغيرين..


تحياتي
وليد فاروق علي
مدونة يا أبت ...إني رأيت

osama يقول...

بيت من الدفء / من النسائم/ من الحنين / من القدم/ من الحلم/ من الروح
ما ابدع تصوريك له...
حروف من شجن...

خالص تحياتي

Zianour يقول...

موناليزا : شكرا لمرورك الكريم ودعواتك
يا ابت اني رايت:شكرا للتعليق مدونتك جميلة .. وعجبني "راديو اسمع منه كلام ربنا" لو سمحت ممكن ابقى انشره هنا بتوقيعك طبعاً؟
اسامة: شكر لمرورك وتعليقك الاسر واعجبتني القصص القصيرة جدا بمدونتك

نور يقول...

حلوه اوى يا زيانور اديتنى احساس بالدفا والانتعاش والهدوء اللذيذ ف نفس الوقت اتخيلت اللى انتى قولتيه بالظبط ووقت الندا وصوت العصافير اللى ممزوجه بضحك ولادكوا الصغيرين ربنا يحققلك حلمك قريب ان شاء الله
على فكره انا نفسى ف حاجه شبه كده
بجد حلوه اوى وشكرا ليكى على الحاله اللى عيشتينى فيها
سلام مؤقت يا جميل

حمامة يقول...

نغسل وشنا
بلون الشروق..
ولون الحيطان
سماوي
معلهمش لوح
الا شخبطة
ايدين
ولادنا الصغيرين..

حلوة اوى اوى بجد

اجمل حلم ف الدنيا
:)

Esraa Hamed يقول...

جميلة احلامك و خيالك و كلماتك
سعيدة جداا بالتعرف علي مدونتك

تحياتي لكي
دمتي بتألق

Zianour يقول...

نور : يا اغلى اسم في وجودي اهلا بيكي ومرحبا ومبسوطة اني خليت اي حد مبسوط امال بقى لو كان اسمه نور!!!

حمامة : حمامة جميلة وقصتكوا فريدة وجميلة خدي بالك من غراب!!نورتي !!

اسراء:انا اسعد يا فندم وشكرا على مكنة الفاجومي
نورتوني واهلا بيكم في البيت..

alabalatta يقول...

انشاء الله يتحقق
بس دى رومانسية جامدة اوى لكن كل واحد حر فى رومانسيتة
ويا ريت ترشدى الرومانسية شوية علشان ما تتصدميش بالواقع المؤلم