عايزاك تزرع لي
جنب بيتنا
اللي ف خيالي
شجرة توت كبيرة
خضرة ..
وطارحة
طول السنة ..
فروعها مايلة حبتين
لاجل تضلل على البيت..
ورقها الاخضر
يرقص ويغني
مع النسيم..
وتوتها قريب
لايدين ولادنا الصغيرين..
*
وما تنساش
تعمل مرجيحة
بين النخلتين..
ايوة نخلتين
على بعض
مايلين..
زي ما يكونوا اتنين
في حالة وجد..
ويحلم الولدين
وهما بيتمرجحوا
امتى يكبروا
علشان يطلعوا
ويسمعوا بيقولوا ايه..
*
أما بيتنا اللي ف خيالي
عايزاه من الطين
بسقف عالي
شايلاه عروق خشب
معشش فيهم
عصفورين..
زقزقتهم تصحينا
نغسل وشنا
بلون الشروق..
ولون الحيطان
سماوي
معلهمش لوح
الا شخبطة
ايدين
ولادنا الصغيرين..
*
ويكون البيت
على شط صغير
طرح بحر
للنيل..
*
وجنب البيت
والتوتة والنخلتين
ما تنساش
تزرع شجر
فل وياسمين
اعمل منهم عقود
الفها حولين
ايدين ولادنا
الصغيرين
*
أما عن المزيكا
فلو سمحت
مفيش ف البيت
غير زقزقة العصفورين
ورقص ورق التوت
مع النسيم
وضحكة ولادنا
الفرحانين..
25.04.2008