الأحد، 30 نوفمبر 2008

سرداب طويل


سرداب في مستشفي الولاده طويل
صرخات عذاب ورا كل باب وعويل
.. وفي الطــــــريق متزوقين البنات
متزوقـــــــــــــين للحب و المواويل
عجبي !!
صلاح جاهين

الأربعاء، 26 نوفمبر 2008

وكسر حزين
بيُشرخ في الروح
ويعدي بيها للضلمة
-
وفوضي الغضب
والكبرياء
ما بتمنعش
الألم
ولا بتوقف الأنين
-
والدموع
نجوم بتلمع
من غير ما تسيل
-
والحيرة طلسم
وقسمة ونصيب..
-
07-11-2008

الجمعة، 21 نوفمبر 2008

بما إن

بما إن النبضات
عمالة تتباعد
وقلوبنا بتهرب مننا
جوه جسمنا نفسه
تعالي
واربَي الباب
بما يكفي لاجل يمر
اللي محتاجينه من الأمل
عشان مانغرقش
وماتخافيش من الموت
ليمر هو كمان
لإنه بيفضل المرور
من الأبواب المغلقة.
ترجمة عن
Jules Supervielle

الثلاثاء، 18 نوفمبر 2008

دقة قلبك

ولما دقة قلبك
تضخ الدفا
في تكويني
بووم.... أتكور
بووم.... اطمن
بووم.... وأنام
على سحابة بلا هموم
..
وسنا من الشمس
تنوْر الثواني
تبقى نجوم
..
لما دقة
قلبك
..
25-10-08

الأربعاء، 5 نوفمبر 2008

حدوتة

كان يا مكان
عدد كبير من المرات
كان فيه راجل بيحب واحدة ست
*
كان يا ما كان
عدد كبير من المرات
كان فيه واحدة ست بتحب راجل
*
وكان يا ما كان
عدد كبير من المرات
واحدة ست وراجل
مابيحبوش الراجل والست
اللي بيحبوهم
*
كان فيه مرة واحدة بس
يمكن مرة واحدة بس
ست وراجل
كانوا فعلاً بيحبوا بعض
*
ترجمة عن روبير دينو
Robert Desnos