الأحد، 26 أكتوبر 2008

سأم خريفي

ويسود حزن ملون
دافي
يحوّطه لون
رمادي
سرمدي..
الورق الأحمر والأصفر والبرتقاني
تنفخه الرياح العتيّة
الساديّة
وتسيب الفروع المكلومة
تصرخ في رعشة
-أو في نشوى-
السما الواسعة
فجأة بقت ضيقة
والسحاب التخين
عمّال يعربد فوق
البيوت..
فسافيس المطر
اللي بتنزل على شمسيتي السودا
بكل رقة
بكل هدوء
مزيكا حزينة
تغطي الألوان
..
ويسود حزن
حزن
رمادي
سرمدي...
16.10.2008

هناك 12 تعليقًا:

Asmaa mahaba يقول...

لا اله الا الله وانا اللى كنت فاكره الحياه وحشه لاقيتك مسوداها ايه يا حماتى مالك :)) كل دا عشان غايبه عنك

كلمة حق يقول...

ليه الحزن
الحياة جميلة وما أجملها إذا كانت مليئة بالحب فى الله

ذو النون المصري يقول...

انا بحاول اكتب شعر مرسل غير مقفي زي ده و جهزت اربع قصائد صحيح موضوعها بعيد عن وضوعك لكن كلامك اعجبني
لكن فيه كلمه غريبه واحده هي فسافيس المطر
فكرتني بثلاثي اضواء المسرح فضحكت
و مش عارف هي فصيحه و للا عاميه؟

Zianour يقول...

سومة
اهلا بيكي.. وحماتك ايه مش بعتي الواد ورحتي اتخطبتي لواحد تاني؟؟؟
ربنا يهنيكي يا ستي ومتغبيش عني


كلمة حق
اهلا بيك
الحياة الجميلة والحب ف الله لا يمنعا الحزن من آن لاخر
والحزن يشعر به كل الكائنات
دمت بخير


ذو النون
اهلا بيك وزيارتك من الزيارات التي تسعدني دائما
والله انا باكتب على قدي
وبالنسبة لفسافيس عندك حق
بس لازم ده تأثير الواد نور عليا
عقبال ما ربنا يفرح قلبك ويقر عينك بالبنين والبنات
ومش عارفة هي فصحي ولا عامية بس اعتقد هي طفولية
دمت بكل خير

سميرة يقول...

الكلمات تمكن تكون حزينة حبتين ، بس انا حبيت اوي وصفك للرياح وكمان الوان ورق الشجر
تعرفي انا بحب اوي لون الورق في الخريف
الورق الاحمر والاصفر والبرتقالي
تنفخه الرياح العتية السادية

جميلة الكلمات
ببوسك :))

Zianour يقول...

سمورة
وحشاني انتي فين يا بنتي
وشكرا على التعليق

والخريف
مرعب الجمال
عقبالك

بوسي القبيلة

مُزمُز يقول...

انا جاي اعلق كمان يومين

m.sobhy1990@gmail.com يقول...

أول مابدأت أقرى إفتكرته نص فصحى
لحد ماقابلت البرتقانى قلت عادى يمكن تكون فصحى

لكن لما وصلت ل "تسيب" قلت لأ ده عامية

ده أولا

ثانيا
قلتى لى على قصيدة سيجىء الموت وستكون له عيناك إنها فاحشة الجمال

أنا بقى باقول "سأم خريفى" لحن على كذا إيقاع

لكن بجد النص فيه حالة غريبة وبيسيب أثر بجد والله مش مجاملة

ده تقريبا أكتر حاجة عجبتنى
الحالة اللى وصلنى ليها النص

ثالثا

مش عارف ليه اليومين دول انا رايح ناحية قصيدة النثر
(:سامعنى يامعاذ؟
وعلشان كده باقول إن القصيدة دى زى اللى قبلها لو كانت نثرية كانت هتبقى أجمل

وبعد هذا الرغى

شكرا على النص الجميل ده
(:

Zianour يقول...

مزمز

اهلا بيك في اي وقت
:))

محمد
أعزك الله ...أوليست تلك بقصيدة نثرية إن شاء الله؟؟؟
وبناء عليه مطلوب من سيادتكم توضيح ما هي القصيدة النثرية لانني لا اعرف بكل صراحة اقولها

دا كان اولا
ثانيا انا مش عارفة ارد على الكلام الكبير والجميل ده ازاي

انا متصورة انني بالعب بالكلام زي اي طفل بيلعب موش متخيلة انه ممكن اللي باقوله يكون يعني بالاهمية دي

عموما ده خلاني اتحفز اكتر وكمان اكون مسئولة اكتر عن الكلمة اللي بتنكتب

واخيراً بعد الرغي ده اقول : انا ممتنة بعمق لكل تعليق يضيف ويدفع العملاق اللي اسمه الكتابة جوايا

شكرا

:)))))))))))))

مُزمُز يقول...

اليومين فاتوا خلاص وانا جيت عشان اعلق على النص :)

انا كنت شايف انه اجمل حاجة قريتهالك لحد ما نشرتي النص الاخير

بوم اتكور
بوم اطمن
بوم وانام
على سحابة بلا هموم


الجزء ده اللي انا عمال اردده من الصبح
من ساعة ما فتحت باب العربية عشان اروح الامتحان ولحد ما خلصت امتحان ولحد دلوقتي

ماعلينا
خللينا في النص ده
يمكن مش اجمل واحد

انا قريت هنا حاجات اعمق
بس هو النص اصلا لا قال انا عميق ولاصعب ولاعويص

النص رقيق

سوناتا عن البرد، دافئة، جذابة مرسومة ومعزوفة ومقطرة، وفي النهاية خالص مكتوبة

يمكن بمعنى اصح
هو اكتر حاجة شفتها حِرَفيّة وقوية ومتماسكة وكاملة في نصوصك

حتى لو مكانتش الاعمق بس انا احيانا بميل للبساطة التأملية دي

البساطة المناسبة لمزيكا الخريف اللي انتي بتعزفيها فيه

مع اني مش عارف انا بطارد التفكير وللا هو اللي بيطاردني

لاني لما وصلت للجزء اللي بتقولي فيه

وتسيب الفروع المكلومة
تصرخ في رعشة
-أو في نشوى-

انا عندي تحفظ اصلا على كلمة لو
لان الرعشة مش نقيض
ممكن تبقى رعشة نشوة

بس مش هيا دي الملاحظة اللي عايز الاحظها هنا

انا عايز اقول ان الجزء ده خللاني افكر
واسأل

الفروع المكلومة
لما تتعرى من ورقها
تفاصيلها
ومألوفاتها ولحظاتها وكثافة ايامها

ليه ميكونش الامر مصحوب بنشوة؟
ليه ميكونش الواحد بيأسر نفسه؟

انتي اصريتي تغمزيني بالفكرة دي ف وسط التأمل البسيط لجو شاعري منغم

ولما جيتي تقفلي النص
عملتي اروع حاجة احب اشوفها في الكتابة

اللعب في القفلة وغلق الدايرة بشكل بارع وحساس جدا في تشكيل الكلمات

مزيكا حزينة تغطي الالوان
..
ويسود حزن
حزن رمادي سرمدي

يخرب بيت النقطتين قبل ويسود

يوخرب بيت تكرار كلمة حزن مرتين
هو ده بهريز الإيقاع

ويخرب بيت حرف الواو المدهش اللي مجنني ده ويسود ويسود ويسود

ويخرب بيت الرغي اللي انا رغيته ده كله

أتمنى مكونش ازعجتك
وطبعا عرفتي انا كنت مأجل التعليق ليه
لأنه تعليق مكانش ينفع يتكتب قبل امتحان الكيميا الفيزيائية أبدا

يللا باي باي بقى
:)

مُزمُز يقول...

انا عايز استكمالا لطوفان الرغي ده

اقوللك ان ليا تعليق بسيط على تعقيبك على صبحي

بتقولي

انا متصورة انني بالعب بالكلام زي اي طفل بيلعب موش متخيلة انه ممكن اللي باقوله يكون يعني بالاهمية دي

عموما ده خلاني اتحفز اكتر وكمان اكون مسئولة اكتر عن الكلمة اللي بتنكتب


.....

حاجة هتبقى وحشة اوي اوي اوي انك تتحفزي وتكوني مسؤولة اكتر عن الكلمة اللي بتكتبيها

جمال الموضوع كله انك تلعبي كده بالكلمات زي الطفل من غير اي مسؤولية

انا كنت بفكر من وقت طويل
بداية لما وقفت خالص عن محاولاتي لكتابة الشعر

كنت بفكر بكل غيظ
واقول

اهو انا لو كان ليا وضع ثابت في الكتابة وصوت شعري واضح ومميز وخاص كنت هبقى استريح واكتب اي موضوع ف دماغي من غير قلق هاكتبه ازاي

وبعدين اعلنت التراجع تماما دلوقتي
بعد محاولات مني للعودة الى الكتابة عن طريق قوالب خاصة وصوت مميز

لقيت ان العظمة الحقيقية كانت لما القصيدة تولد نفسها
وحرفتها تبقى جواها
او زي ما اليوت بيقول بشكل علمي اكتر

تكمل بناء جسدها العضوي كاي كائن حي دون تدخل ملموس من الشاعر ودون اهمال لها منه يبعدها عن مسارها الاصلي

يعني الهواية تقريبا على ما احب افهم انا
هواية اللعب بالكلمات بعد ما القصيدة تتخلق والكتابة تكتمل لوحدها كنسق خيالي وبعدين تترمي على ورقة ويبدأ الواحد يتدخل فيها بكل براءة وطفولة

ساعتها فكرت اني لو سبت نفسي كده
زي ما كنت بعمل زمان
هلاقي الكتابة اسهل
وهلاقي نفسي مش مشغول باي نص جاي
ولا اي نص فات

وبأكد لنفسي
اني لما اكتب من غير اسئلة ومن غير توتر يبقى مش بكتب ومش هو ده الصوت الشعري

انا بعدت شوية عن الموضوع متهيالي بس متهيألي برضه وصلت قصدي

.....


بعيدا عن ده كله بقى
عندي اضافة كمان اخيرة

المزيكا دي
نصك ده بيفكرني بيها جدا
http://www.4shared.com/file/54606785/a39b7cc1/Don_t_fall_asleep_-_Zbigniew_Preisner-BLANC_Soundtrack.html


اظن انا كده مش هعلق تاني ف اي حتة لمدة شهور جاية

:)
باي باي بجد المرادي بقى

Zianour يقول...

معاااااااااااذ


!!!!!!!!!!!!


شكراااااااا


:))))))))))))))))))))